原來做學生的時候係咁幸福架, d假多到爆炸
可惜....人總係失去時才覺珍惜
踏入社會之後除非中左六合彩, 否則都唔使旨意仲可以好似學生咁無憂無慮啦.....
講遠左 tim
無啦啦有感而發都係因為睇左自己同朋友以前d日記
諗返好多高考時期的日子
當時日呻夜呻覺得溫書好辛苦
而家反而覺得只擔心讀書的日子好幸福.....
大專畢業後出黎社會幾年 (請勿意圖或企圖計我年紀XD)
日日為兩餐奔波, 連續過左幾年放假無所事事的日子
出街又嫌累, 留係屋企又嫌悶
呢年幾加入左寫 Blog的行列, 總算為自己搵到個方向, 搵到個興趣
一向都喜歡執筆, 但仲摸索緊自己的路向
寫美容 blog係咪自己的 true match, 我仲未可以講實
唯一知道的係暫時仲會繼續落去
雖然唔係想像中咁簡單, 但仍然一直有所得著
人生其實不過如此, 當若干年後回想自己有幾年這樣的日子, 其實都算青春過丫。
唔講唔講, 又扯遠, 好啦返黎咯~~~(問米mode)
寫左一年左右 blog 文, 其實自己比較喜歡試粉底
因為自己塊面瑕疵多, 試粉底可以有好明顯的分別比大家睇到
大家睇文都係想知好唔好用, 我完全係可以做瑕疵派掌門啦!
今次試的是 L'Oréal Paris True Match 肌膚完配系列粉底
每次試妝物我都會出妝文咁出
本來構思緊化咩妝好, 不過因為某d原因所以放棄 (原因就係太忙+懶)
請大家多多見諒 XD
而, 係試2件產品的期間, 我已經睇到好多 sis 的分享, 因為佢地的評價太正面喇
所以我有期待架 !!!
但係.....試完我有d失望, 試多幾次仍然係咁, 一定要同大家分享!
首先要分享的是 L'Oréal Paris True Match Liquid Foundation 肌膚完配保濕粉底液 ($145)
睇到個中文名時, 我立下眼以為係「元配」..... 即刻諗....咩大婆呀 XD
後來先知係「完美絕配」的意思 XD
呢個系列的賣點是: 「膚色、膚質、完美配合」
而呢枝粉底液是特別為亞洲人膚色膚質而研製
既有遮瑕效果, 亦有自然透薄的效果!
搽上面仲非常易推, 我選的是 R2色, 推開後真的能融合肌膚顏色!!!
(當然如果你皮膚很白但又去買 G3 咁真係唔好諗住會好自然融合囉......)
睇下我化上臉的效果 ~ 我第一個感覺除了易推之外, 是 --- 遮瑕力一流~
有少少意料之外呢, 因為好少粉底液唔杰身但又夠遮瑕度架 !
上面張After未加遮瑕膏未加碎粉, 見到鼻翼位、眼圈、瘡印、泛紅都遮到8成
四個字: 始料不及!
但, 另一樣始料不及的是..........它控油麻麻地!!!! (☜ 一定有人立下眼以為我打油麻地)
朝早8點化好妝, 到中午已經有油光了.....鼻子尤其嚴重
唔係出左少少油令到個妝更貼果隻, 而係有油光果隻.....
但幸好不至於浮粉溶妝, 用紙巾印一印就ok
所以, 用之前最好先用控油 base, 夏天更甚呢~!
唉呀呀, 如果控油方面做得好少少, 就 perfect 架啦真係!
★
★
★
另一件產品是
L'Oréal Paris True Match Ultra-fitting Two Way Power Foundation 肌膚完配貼薄兩用粉餅($148)
我揀的色號是 N1, 而佢既賣點就是有三層保護粒子, 令底妝更貼薄自然
它的 Mirco Layer極致分層科技更可以穩定粉質, 親膚度提升, 造出順滑貼面妝容。
用附帶的粉樸上手的效果非常自然! 如果唔係佢有少少光澤感, 我睇相都分唔清邊一邊有上粉 XD
上面效果又點呢?
話明係兩用粉餅, 即係可以乾用, 又可以濕用, 所以我兩樣都有試!
乾用:
話明乾上即係就咁拎起個粉樸上粉~
好多人話粉餅的遮瑕度高, 又方便
但如果乾肌的話, 就太適合用粉餅啦, 因為萬一重手左, 好易會起乾紋, 甚至甩皮
我呢種暗瘡肌+外油內乾,都一樣不太喜歡用粉餅!
曾經用過 Chanel 皇牌粉餅都係失望而回 ! 皇佢個牌丫.....400蚊呀大佬!
咁, 我乾上 Loreal 的肌膚完配貼薄兩用粉餅效果又係點呢?
睇落都覺得還算 ok但其實我上粉上得好吃力
我好驚訝佢個粉樸原來好難推....................
不過真係唔厚, 夠薄, 唔會變粉人, 亦有一定遮瑕度
其實我已經用左保濕base打底, 但你都見到睇落唔平滑, 冇光澤感
對比粉底液的效果真係爭少少!
濕用:
雖然話係濕用, 但唔係要整濕個粉餅或者整濕塊面
而係要整濕個粉樸
我就用爽膚水噴濕個粉樸先再沾粉
記得唔好成個粉餅都掂晒, 濕的地方最好次次一樣, 一小個面積就好了
留返其他位置乾用嘛!
好多人話將two way cake濕用的效果就等於粉底液, 只不過更方便
但我不太認同......
嚇! 又係咁難推既????
我試過將粉樸沾上不同程度的濕度......都一樣有點推難~
不過我覺得濕用的效果比乾用好, 至少唔會覺得乾巴巴的
但如果我來選, 我寧願用粉底液~~
這盒 two way cake 用來補妝 / 當碎粉定妝反而一流~
以前好多人嫌 two way cake 厚身, 補妝 / 定妝只會令妝容愈來愈厚
但因為呢盒夠貼薄但又有一定遮瑕度, 所以補妝 / 定妝用絕對是上品!
最後是, 2款肌膚完配系列產品都不會焗住皮膚起粒粒
WinWin 親身驗証, 暗瘡肌可以放心 !
某周末用了肌膚完配保濕粉底液+肌膚完配貼薄兩用粉餅定妝外出....
連古sir都覺得個妝可以扮素顏! 陽光底下望都唔覺搽左粉喎, 幾勁 XD
「我的 No.1 True Match : 選對粉底,偽素顏話咁易 ! 」
今次真心評2款產品, 希望大家會搵到自己的 true match 啦 !
